Фиона, Малезија (2013)
Додека го читам ова во денешно време, исто како да ме погодила временска капсула.
Фиона ми ја испрати оваа разгледница кога го планираше нејзиното патување на Балканот и воопшто низ Европа. Гледајќи од денешна перспектива и кога веќе ја познавам лично, па дури и ми беше специјална гостинка во мојот дом, навистина е чудно да се прочита она што тогаш го напиша, дека таа „можеби нема да помине ниту покрај Битола“. Постарата јас се смее.
Но, баш во тоа е убавината. Ова само ми покажува дека без разлика на нашите планови, животот секогаш има друг план за нас. И поголемиот дел од случаите така е уште подобро. А јас сум многу среќна што се случиле така и на тој начин…
Инаку Фиона и нејзиното семејство имаат фамилијарен бизнис со водени спортски активности како и траекти кои одат до островите што се на разгледницата. Тоа е прекрасно, многу многу прекрасно.
Дополнителни информации – На самата разгледница е напишано дека Паркот Тунку Абдул Рахман (именуван според првиот малезиски премиер) е составен од пет острови – Гаја, Сапи, Мамутик, Манукан и Сулуг. Тоа всушност претставува морски резерват, со природна галерија од калеидоскопски корални градини и морски животни.
Сите пет острови се делумно пошумени, со мешавина од карпести крајбрежја и плажи со бел песок. Идеални се за нуркање, разни спортови на вода и излети покрај плажите. Најголем меѓу островите е Гаја со 15 км2 недопрена густа дождовна шума.
Звучи како совршено место❤